Talant que j’ai d’obeïr
Et de fere le plaisir
A celle en qui mi desir
Sont tuit tourné
Mon cuer et cors a tourné
De lui servir,
Et je de cuer sanz faillir
La serviré
Volentiers et de bon gré
Sanz repentir.

Ne me devroie alentir
De son vouloir acomplir,
Quar (d’)elle puet bien venir
Plus que je n’ai
Poair, ne je ja n’auré,
De deservir ;
Et se je n’en vueil mentir, veil
Je chanteré
Pour s’amour et l’ameré
Sanz departir.

Tant m’agree
La journee
Que la de bon’heure nee
Regardai,
Que donnee
Et octroiee
Li fu des lors ma pensee
De cuer vrai.

Honnouree
Et bien amee
Sera de moi et löee
En mon lay,
Redoutee
Et foy portee,
Et sa bonne renommee
Garderai

Plaisant et de bel acueil,
De simple atour sanz orgueil
Est la bele, simple et coie ;
Tout mon cuer a li s’otroie.
Luisant com or en souleil
A le chief et riant l’ueil,
Le vis cler et plain de joie ;
Si l’aim, de riens ne foloie.

N’a pas couleur de fanoil :
Quant la voi, point ne me dueil ;
Meilleur amer ne pourroie.
Dieus ! pour quoi le celeroie ?
Mieus flaire que fleur en brueil
Sa douce bouche, mon vueil
L’odour douce en sentiroie
Souvent, se son gré avoie.

De cors, de braz, de faicture,
De membres et de stature
Est si bien faite a droicture
Que trop grant mestrie
Fist de li former Nature,
Si c’onques en pourtraicture
De bon ouvrier n’en pointure
Ne fu d’ueil choisie.

Mieus fourmee creature,
Clere ou brune sa teinture.
Bien ait qui a nourreture
La traist, que qu’em die !
Gracieuse en fu l’ourture ;
Saisi de douce pasture
Seroit qui par sa ceinture
L’auroit embracie !

Je requier Dieu qu’il me preste
Sens par sa bonté,
Que je de pensee nete,
Sanz raim de vilté,
Puisse servir la doucete
Qui tant a biauté.
Nule plus savoureusete
Ne mains de fierté

N’est, ne qui miex s’entremete
De toute honnesté ;
N’ai mestier que trop aigreite
Me soit. Volenté
Li prengne tele que mete
Souz pié cruauté,
Ou de fierce en eschec traite
Me tieng pour maté !

Hé diex comment
Aurai briément
Alegement
De cele que j’aim loiaument,
Qu’acointement
N’i ai ? Tourment
En ai ; griément

Me destraint, et si asprement
Qu’apensement
N’ai, seulement
Tant c’umblement
Li die que siens ligement
Sui vraiement :
De ce ne ment,
Decevement
Ne pens, se Damedieu m’ament !

Pour quoi decevroie
Celle qui maistroie
Mon cuer d’endurer
Le mal qui m’asproie ?
Trop que fox feroie !
Sanz li ne pourroie
Longuement durer
Ne je ne vourroie.

Se chose li proie
Dont courrouz li doie
Venir, destourner
Me feroie en voie.
Grant chose prendroie :
Ma joie en verroie
En ire tourner ;
Ja mais bien n’auroie.

Et puis qu’en irour em irour
Et en grant tristour
Vivroie, je ne demour
Plus en tel errour.
Ce seroit folour !
Mes se par douçour
Et par vrai semblant d’amour
Humble, sanz coulour,

Paree d’ardour
Dont tout me devour,
Puis a celle que j’aour
Moustrer ma doulour,
Pitié ou tenrour
Li prendra un jour
De moi qui moult souvent plour
Pensant a s’onnour.

Liez ne serai,
Et chanterai
Et parferai
Mon lai, ne la tristesce tritesce
Qu’en mon cuer ai
Ne mousterrai
Ne ne ferai
Savoir quel mal me blesce ;

Ains attendrai
Et celerai
Tant que verrai
Lieu de dire l’aspresce
Que souferrai
Tant com vivrai.
Ne n’estordrai
De mort se ne m’esleesce.

Quant j’esgart
Celle part
Dont le dart
Me vint ferir, de duel m’art
Et m’essart
Et m’espart
Le cuer qu’art,
N’engins ne truis. Moult m’est tart

Que m’ampart Ou le quart
D’un regart
M’envoit celle que Diex gart.
Main ou tart
Ne regart
De l’espart
Qui de son cler vis se part.

Quant remir la noble ouvraingne
De li, je me seigne,
N’adonques n’ai nulle engaigne,
S’elle ne m’adeigne.
N’est riens qu’a biauté souffraigne
Qu’em li ne s’espraingne ;
Quant bien i pens, en estrainne
Douceur tous me baingne,

Ne ne sent douleur grevainne
Qui tost ne remaingne.
Celle n’a per ne compaingne
Qui d’amer m’ensainne.
Si pri mon cuer qu’il apreingne
Si que n’i mespreingne :
Je n’en quier autre gaaingne
Mes qu’a sien ne preingne.

Humble, franche, en qui s’aaire
Tout bien, croire
Ne poëz ! cuer debonnaire,
Laictuaire
Dous a gouster pour atraire
Cuer qui traire
Se veut en bien sanz retraire,
Tout contraire
Soufferroie ou moi detraire

Ains qu’estraire
M’en doie, ja droit soutraire
Sanz mestraire
L’oeil qui en moi vint pourtraire
L’essamplaire
De vous ; tout temps me doit plaire
Sanz desplaire.

Chantant pri vous, dame chere
A haut cri qu’em ma proiere
N’ai estri, poour que « fiere !»
Ne vous cri ; ne n’avez chiere ne vous tri
Que d’otri soiez legiere.
Tant me fri, douce guerriere,
Que detri si ne me fiere
Que murtri ne mete en biere.

Esmeraude pour joïr,
Qui avez du vrai saffir
Toutes vertuz pour gairir
Et pour santé
Prester a ceus qui usé
Sont de sentir
Mesplaisans griés qui ravir
Sevent ains né,
Qu’en pöez donner plenté c’en poez
Sanz amenrir,

Ne vous voillez assentir
Qu’ainsi me lessiez perir !
Rubi que l’en doi chierir,
Fin coulouré,
Plaise vous qu’en charité
Dagnés oïr
Ce lai ! Ci le voeil fenir
A vostre gré.
Plaist moi, qu’a vous sui donné
Sanz retolir.